 |
கவிதை
ராஜன் ராஜீயான க(வி)தை
கோகுலன்
பெண்குழந்தை இல்லாத வீட்டில்
ஏக்கங்கள் உருக்கிச்செய்த
வளையல் கொலுசு
அணிசெய்த பால்யத்தில்
ராஜீயானான் கடைக்குட்டி ராஜன்
ஆசைகள் விளையும் மனதின்
கவிழ்ந்த இருள் தொட்டு
மையிட்டு விளையாடப்பட்டான்
வழமையின் அஸ்திவாரத்தில்
வலுவாய்க் கட்டப்பட்டது காலச் சுவர்
ராஜீயாக்கப்பட்டவள் நினைத்த நேரத்தில்
ராஜனாகாததைக் குறித்து
முகம் திருப்பிக்கொண்டது பாசம்
காரணமறியாது கைபிசையும் தாய்மைக்கு
பாரதியைப் பாடிவைத்தேன்
கூலியாய் வாழ்க்கையினைக் கேட்ட வளர்ப்பு
கௌரவத்தில் திளைக்குமெனில்
நம்பித் துயில்கொண்ட வீட்டில்
நள்ளிரவின் பலாத்காரத்திற்கும்
இதற்கும் குறைந்தபடசம்
எத்தனை வித்தியாசம் சொல்லமுடியும்
கூண்டைவிட்டு கூடுதேடும் பறவையாய்
ராஜீ வாசல்விட்டுப் பறந்த நள்ளிரவில்
சொட்டுதலின் திராணியின்றி
மழைக்கூரையில் காய்ந்துகொண்டிருந்தது
கடைசித்துளியொன்றின் கனம்போதாத வாழ்க்கை
- கோகுலன் ([email protected])
இவரது மற்ற படைப்புகளைக் காண இங்கே அழுத்தவும்
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|
|
|
|
