 |
கவிதை
மழைக் குறிப்புகள் - 2
குட்டி செல்வன்
மரங்கள் சூழ்ந்த
வனம் இன்று செழித்துக் கிடக்கின்றது
வழக்கத்தைக் காட்டிலும் அதிகப் பசுமையாய்
அருவியின் குளிர்ந்த நீர்த்துளிகள் கரும் பாறைகளிலிலும்
என் முகத்திலும் விழுந்து உடைகின்றன
எதையோ முணுமுணுத்தவாறு
மலையுச்சியிலிருந்து வழியும் ஓடை
சில்லென்று பாடிச் செல்கின்றது
பிரிவின் இரகசியப் பாடலொன்றை
இலைகள் சேகரித்துக் கொண்டிருக்கின்றன
எண்ணிலடங்கா மழைத்துளிகளை
மிகவும் அமைதியாக
பொழிந்தது போதுமெனக் கலைந்தோட முயலும்
கார்மேகங்களை இழுத்து உலுக்குகின்றேன்
கொட்டிவிட்டுப் போகின்றன
மீதமிருந்த நம் பிரியங்களை
நானும்
இவ்வனமும் இன்று செழித்திருக்கின்றோம்
இம்மழையால்
சாலைகளில்
சேறும் சகதியுடனும்
அழுகிய காய்கறிகளின் விரும்பத்தகாத வாசனையுடனும்
போக்குவரத்து நெரிசலில் பொறுமையிழந்தவாறும்
கையில் கறுப்புக் குடையை பிடித்தபடியும்
பெரும் இடையூறாய்த் தொடரக்கூடும்
நகரத்துவாசிகள்
இதே மழைகாலப்பொழுதை
- குட்டி செல்வன் ([email protected])
இவரது மற்ற படைப்புகளைக் காண இங்கே அழுத்தவும்
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|
|
|
|
