நட்புடன் உன் காதலி அல்லது காதலுடன் உன் தோழி

உன்னிடம்
எனக்கிருக்கும்
நேசத்தை
எப்போது உணர்ந்தேன்?

இரவுகளில்
தனிமையைத் தின்று தீர்க்க
ஆரம்பித்தாயே அப்போதா?

இதயத்தின் துயரங்களை
சுமக்க சம்மதித்தாயே
அப்போதா?

அருகருகே செல்கையில்
ஸ்பரிசித்துக் கொண்டோமே
அப்போதா?

கால்டுவெல் முதல் தஸ்தாவெஸ்கி வரை
மணிக்கணக்கில்
பரிமாறிக் கொண்டோமே அப்போதா?

நமக்கிடையேயான
முரண்பாடுகளிலும்
உடன்பட்டு பயணிக்கத்
தலைப்பட்டோமே அப்போதா?

இவையாவுமாகவும் இருக்கலாம்..
இதற்கும் மேலாக
முதன்முதலில்
உன்னைச் சந்தித்த
கணமிருக்கிறதே
அப்போதுதானிருக்கும்..

-------------------------------‍‍‍‍

கால்பந்தில் கோல் எடுப்பது..
மட்டைப்பந்தில் விக்கெட் எடுப்பது
இறகுப்பந்தில் புள்ளிஎடுப்பது
சதுரங்கத்தில் வெட்டி வீழ்த்துவது
எல்லாவற்றிலும் வெற்றி தோல்வியை
ஒருவரின்
கண நேர பின்வாங்குதல்
அல்லது
நொடிநேர சுதாரிப்பு
ஏதோ ஒன்று
தீர்மானிக்கிறது..
காதல் விளையாட்டில்
மட்டும்தான்
ஒருவரின் வெற்றி
இன்னொருவரின் வெற்றியாகவும்
ஒருவரின் தோல்வி
இன்னொருவரின் தோல்வியாகவும்
மாறுகிறது..

---------------------‍‍‍‍

இரு குழுவாக பிரிந்து
ஒற்றைப் பந்தை
உதைத்தாடுவதைப் போலிருக்கிறது
ஒற்றை நேசத்தை இருவரும்
நட்பென்றும்
காதலென்றும்
பந்தாடுவது..

----------------------‍‍‍‍

உனக்கு எழுதப்படும்
கடிதம்
மகிழ்ச்சியளிக்கிறது
நட்புடன் உன் காதலி
அல்லது
காதலுடன் உன் தோழி
என கையெழுத்துடுகையில்

-------------------------‍‍‍‍

உன் பேர் கொண்ட
அமைச்சரிலிருந்து
ஐந்து வயது பையன் வரை
அனைவரையும் பிடித்துப் போகிறது
என் நாணத்தையும்
மகிழ்ச்சியையும்
பூக்கச் செய்கிறது ..
உன் பெயரின்
நான்கெழுத்துக்கள்... 

------------------------‍‍‍‍

உன்னை நேசிக்கிறேனென
பலமுறை சொல்லிய பின்னும்
ஏற்றுக் கொள்ள முடியாதென
தொடர்கிறாய்
பிடிவாதத்தினை
தொடர்கிறேன் நானும்
எனக்கான பிடிவாதத்துடன்..

------------------------

- இவள் பாரதி (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)