மழைமேகம், அம்மம்மா!!

மழைமேகம் மழைமேகம்
மலைமேலே மழைமேகம் -
மலைமகளொடு மலைவளமொடு
மளமளவென இழைமேகம்!

இழைமேகம் இழைமேகம்
இலைமேலே இழைமேகம் -
இலைதழையொடு எழில்பொழிலொடு
இளையவளெனக் குழைமேகம்!

குழைமேகம் குழைமேகம்
குலைவாழைக்(கு) உழைமேகம் -
குழையணிதமிழ் மடவார்குழல்
குலமெனக்கவி விழைமேகம்!

விழைமேகம் விழைமேகம்
விளைவதுதர விழைமேகம் -
விசும்பின்துளி பசும்புல்தரை
விளம்பும்குறள் அழைமேகம்!

அழைமேகம் அழைமேகம்
அலைந்தலைந்தே அளைமேகம் -
அலையலையென அழகழகென
அருளருளெனத் தழைமேகம்!

தழைமேகம் தழைமேகம்
தகைபுகழொடு தழைமேகம் -
தளைதொடையொடு நடமிடுகவித்
தமிழ்மேகம்.. அம்மம்மா!

- தொ.சூசைமிக்கேல் (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)